(كتب الشيخ ربيع قبيسي المسؤول الثقافي لإقليم جبل عامل في حركة أمل من الجنوب لإم شربل كرم على الفيس بوك)
أم شربل قلبها محروق ناطرة ومش عارفة مصير إبنها ، حِكيت من وجعها وبكينا معها وتأثّرنا ، حكيت حكي هي ومنفعلة ومش عارفه ليش حكيته ، هالحكي خلّى كتير من أهل #الجنوب يتأثروا وينزعجوا .
روقوها يا شباب هيدي أمنا ناطره خينا ومش عارفة شي عنه ، قلبها أسود من الحزن ومحروق ، هيدي أم مصدومة.
رح قلك يا إمي !
نحن ناطرينك بالجنوب بمدينة صور حتى نعمل قداس #بكنيسة سيدة البحار على نية #شربلكرم وكل المفقودين والشهداء ونصلي سوا وتتعرفي ع #الجنوب وأهله الطيبين يلّي عاشوا حروب وتوتر وانفجارات سنين طويلة، قدّموا #شهداء بالآلاف شباب حلوين ومؤمنين بلبنان كرمال تبقى #الأرزة ، ونزل عليهم كتير قذائف وقصف ودمار لأنه ما بدهم إلا الكرامة ، خينا شربل يلي هو إبنك رح يكون معهم بالجنة إذا كان شهيد وإذا رجع رح نسقي سوا الأرزة متل ما قالت أم #جوعقيقي ومتل ما عملت إم #محمد_سعد .
الجنوب يلي مش رح تقدري تميزي بين الآذان وصوت أجراس الكنيسة ، الجنوب يلي علمنا في #موسى_الصدر إنه كلنا إخوة عشان هيك نحن متلك ناطرين شربل وكل المفقودين وعيوننا دموع عَ الشهداء يلي راحوا .
ناطرينك بالجنوب يا أمنا يا أم شربل.
الله يصبرك?
وهذا الكلام كان ردا على الكلام الذي أطلقته ام شربل عبر إحدى القنوات اللبنانية بعد فقدها ابنها في تفجير بيروت حيث قالت: “يروحوا يفجروا بالجنوب نحنا شو ذنبنا”
